TJ Manuna chuan, chu dan siamthat tur chu tehna chi hnih hmangin kan lo teh nghal a, ramngaw, nungcha leh sik leh sa inthlak danglam zel tur ven that leh, kan lui tuihna kiam zel tur venhim kawngah dan thar hian tihdal emaw tihbahlah a awm thei em? tih thlengin kan official-hote nen zirchian nghal a ni a. Mizoramah hian Forest Act hi kum 1955 ah kan neia, khatihlai khan state thuneihna hnuai(sate list)ah dah a ni a, kum 1976 a India Constitution siamthat(amend 42nd) a nih khan, centre leh state thuneihna intawm(concurrent list)ah Forest Act hi dah a ni leh a ni. Central in forest dan siamthat a tum lehna ah khan India ram pumpui central thuneihna(Union List) ah dah tumna ni ah kan ngai ta a, kan ngaih pawimawh ber chu he dan siamthat tum hian Article 371G a kalh em tih ni a, kan zirchianna zawng zawngah article 371G hi a kalh vek a, khatihlaia kan CM Pu Zoramthanga thurawn min pek angin, NGO hrang hrang leh party hrang hrang hruaitute kan rawn a, kan zavaia duhdan angin leh Mizoram Assembly duhdan angin central lamah kan duhloh thu kan thawn ta a ni, a ti bawk.

TJ Manuna chuan, Sorkar anga kan tih theihchin a tawp tak hnuah, mipuia zualko kan duhlaiin inthlanin min nangching ta si a, 'kha dan kha a guideline te zirchian a tha e,' tih theih tur kha engmah guideline ala awmloh avangin kan tlaksan ta a ni, a ti a. Ni 29.12.2023 khan a dan alo chhuak leh a, FCAA hian kan ram khawilaiah pawh, Ramri atanga kilometer 100 huam chhungah hian kan awm vek a, chu chuan kan ram tihchhiatna tur kawng zau tak a inhawng dawn a, ram tihchhiatna turin clearance ngai tawhloin centralin an duhna lai lai an hmang thei tawh dawn a ni, a ti.

Ex-Forest minister chuan, FCAA, 2023 hi duhlohna lantir hunlai, Bill ala nih lai atangin, theihtawpin kan dodal a, kan sorkar lai pawhin comment te pawh ziakin kan thehlut tawh a, tuna kan sorkar erawh chuan dodal loin, a pumpuhlumin an duhthu a resolution an siam ta hi a pawi takzet a, a pawizia hi kan la hmu chho zel dawn a ni, a ti bawk. 

Kan hnam sipai martar ten Article 371G hi Zoram mipui tana an sualchhuah a ni a, he dan hi MNF ta bik niloin Zofa tawh phawt te ta a ni a, Zofaten a neitu rilru nen kan hlut deuh deuh a tul a ni, a ti a. Kan ramri ah hian 1933 la hmang mah ila, Assembly ah kan la adopt loh avangin, 1875 ramri hi engtiklai pawhin kan la claim thei reng a ni, a ti bawk.

FCAA hi theihtawp chhuahin MNF ten ka do a, central lamin state sorkar sihhnipna hmuin an rawn tilui tang tang a, tunah hian project engemawzat kalpui an tum a, chutah chuan kan ram rorelna sang berah ZPM sorkar hian assembly house ah an lo surrender ta ni. He danah hian a guideline an lo thun tel a, guideline hi siamthat a awl em em a, chuvangin, he dan hi kan ram tan a him lo leh zual a ni. MNF chuan kan ram leh hnam humhimna turin, eizawnna hrang hrangah te mipui harsatna thlen thei tur anih avangin kan duh lo a. Chuvangin, kan ram leh hnam humhimna tur a nih avangin ZPM sorkar hian a hnuhlet leh ngei theih nan mipuite kan tanrual a ngai takzet a ni. Hnam himna movement hi development nen insiamrem pui ve chi ani lo a. Hnam dam khawchhuahna hi kan tum ber tur a ni. Party hrang hrang leh NGO te kan hnam him zel nan, Hnam khawih thilah chuan kan zavaiin i tangrual zel ang u, a ti bawk.

TJ Manuna chuan, Dampa bial By Election neih turah bial mipui rilru thianghlim pu Neutral rual ten MNF Candidate Pu Thangtea an duh tlang hle a, MNF ah beiseina sang tak an nei a ni, tiin, Dampa bial mipuite chu MNF Candidate lo vote vek turin ka sawm takmeuh a ni, a ti bawk.

He hunah hian MZP Treasurer hlui leh West Phaileng Welfare hruaitu hlun leh Finance Secretary nimek Michael Lalramsanga chu MNF Party ah ram leh hnam rawngbawl hna chhunzawm turin Pu Zoramthanga, President, MNF chuan a lawmlut a. Michael Lalramsanga chuan thusawiin, Tun hnaiah kan ram leh hnam himna tiderthawng zawnga hmalakna a awm hian rilru a ti na a, Mizoram leh hnam him zelna tura theihtawp a ke pen ve turin Mizo Hnam Party ah ka rawn lut a, Mizo Nationalism tuipuitu ka nihna angin a taka lo thawk tawh leh thawk mekte ruala pen ve hi ka chak a. Martarte thisena bual Art 371G ropui zia ka hmuchiang a, a humhim turin theihtawp chhuah ka inhuam ve a ni, a ti bawk. Dampa bial mipui zawng zawngte tun by election lo awm turah MNF Candidate, mi chak leh a ngaihna hria Pu Thangtea Vote vek turin ka sawm a ni, tiin, MNF sawrkarin Dampa bial min ngaihsakzia hi kan hriat nawn fo a tul a ni, a ti bawk.